NADISMAYA ang mga negosyante sa palengke sa GenSan tungod sa kamahal sa presyo sa mga palaliton ug gamay ang ilang ginansya matag adlaw tungod hinay ang palit sa ilang mga baligya. Sumala ni Liezel Romero gamay ang patong sa ilang mga tinda nga lamas aron lang adunay mga kostumer nga mopalit.
Sa matag kilo sa mga lamas sama sa bombay, kamatis, luy-a ug ahos anaa lang sa P10 ang ilang ma-ginansya. Gitino sa ginang nga nakasinati sila og tumang kahinay sa halin karong tuiga ug ang ginansya niya kaniadto nga mokabat sa P30,000 matag adlaw anaa na lamang sa P5,000 ang kita niini karong higayona.
Tungod niini nakahuna-huna si Romero nga isirado na lang iyang tindahan gawas sa ubos nga kita kanunay matud pa kini magdugang og capital samtang walay dako nga ginansya. Dako kini nga epekto sa ilang negosyo labaw na sa pagkinahanglan usab sa ilang mga pamilya.
Naglaom ang kadaghanan sa negosyante sa dakbayan nga adunay himoon ang mga bag-ong administrasyon sa gobyerno sa Pilipinas nga sa ilang paglingkod sa pwesto mo-ubos ang presyo sa nag-unang mga palaliton nga maoy kanunay gikinahanglan sa mga tawo. I Enamie Mogpon