Nagpabiling blangko pa ang kapulisan sa kamatayon sa batan-ong misyonaryo kinsa gipusil-patay, pasado alas 12:00 sa tungang gabie, Enero 21, 2024 sa Purok 5 Panansalan, Compostela, Davao de Oro.
Ang biktima nailang si Jepher Joy Ombos, 17 anyos, literature evangelist sa Seventh Day Adventist nga taga Salingkomot Baganga.
Sa eksklusibong pakighinabi sa Brigada News team kang PLtCol Gomersendo L. Diwata II sa Compostela Municipal Police Station, gibutyag niini nga dili pa nila matumbok ang motibo sa krimen sanglit reheliyoso ug wala matod pay nakaaway ang biktima ingun man nadawat nga hulga sa iyang kinabuhi.
Dugang ni PLtCol Diwata II, dili pa masulti kung gitulis ba ang batan-on sanglit walay nawala nga mga gamit niini lakip ang iyang gimanehong motorsiklo ug ang dalang salapi sa biktima anaa lang sa P200 nga igo pangtubil.
Nasayran nga ayha ang krimen, gikan pa naglusad og krusada ug pagbawtismo sa Boston Davao Oriental ang biktima kauban ang miyembro sa ilang simbahan.
Apan atol sa ilang pagpanguli padulong og Tagum naulahi matod pa si Jepher gumikan duna pa kini gipaningil sa ilang libro nga gibaligya ug nanghilot pa usab kini.
Nakaplagan na lamang ang patay’ng lawas sa biktima Dominggo sa buntag nga nagbuy-od daplin sa dalan sa maong lugar.
Nakahiagom ang biktima og samad pinusilan sa ulo ug tiyan nga bahin ug gituohang iya sa .45 caliber.
Sa karun padayon pa ang lawon nga imbestigasyon sa kapulisan aron sayron ang motibo ug responsable sa krimen.
Samtang ang patay’ng lawas sa bikima anaa temporaryong gihaya sa punerarya sa Compostela, Davao de Oro ug gikatakda kining dalaon ilang lugar.