Patay sa hot pursuit operation sa Toril Police Station ang usa ka alyas “Mark” 29 anyos, ulitawo, payong-payong drayber, nga taga Toril ning syudad nga nalambigit sa robbery hold-up kagabii, Hunyo 3, tuig kasamtangan.
Una niini, midangop ang usa ka babayeng biktima sa Toril Police Station human kini nahold-up sa usa ka payong-payong drayber nga iyang nasakyan gikan sa Toril Proper pa-ingon sa Bankas Heights, Toril, ning syudad.
Gisaysay sa biktima na kalit kining giti-onan ug baril ug mideklara’g hold-up ug pugsanong gikuha ang iyang bag nga dunay sulod nga kwarta.
Gihulagway pa sa biktima nga ang maong suspek nakasuot ug jersey, orange nga kalo ug naka shorts.
Daling miresponde ang kapulisan sa Toril Police Station ug sa ilang pagpanubay sa may Brgy. Bato, Toril ning syudad positibo nga gi-ila sa biktima ang nanulis kaniya.
Sa dihang pagdakop sa maong suspek, kalit kining ningbunot sa iyang baril ug gipusil ang miresponde nga pulis. Maayo na lang abtik nakalikay ang pulis ug nakabalos ug paboto diin nakahi-agom ug samad pinusilan ang suspek.
Daling gidala sa balay tambalanan ang samaran nga suspek aron matambalan apan gi-deklarang dead-on-arrival.
Narekober sa Davao City Forensic Unit ang usa ka .38 revolver ug mga bala, unom ka pakite sa gituohang shabu, ug mga kinawat nga gamit sa biktima.
Samtang, subling nagpahinumdoma ang kapulisan nga kanunay’ng magbinantayon ug mureport gilayon sa pinakaduol nga Police Station aron nga marespondihan o mahatagan og kasulbaran ang krimen.
📷Toril PNP