Nagpadayon ang hot pursuit operation sa kapulisan batok sa suspek nga mipusil-patay sa bag-ong napili nga Brgy. Captain sa Brgy Datu Abdul, Panabo City.
Sa inisyal nga imbestigasyon sa Panabo PNP, nahitabo ang pagpamusil pasado alas-3:00 kagahapon sa hapon, Nobyembre 7, 2023 sa Purok Mangga Barangay Datu Abdul Dadia sa dihang pauli na ang biktima nga nailang si Engr. Paul Albert Saquian, sakay sa iyang sakyanan.
Pag-abot sa lugar diin nahitabo ang insedente, kalit na lamang kini nga gipusil sa duha ka wala mailhing indibidwal sakay sa motorsiklo.
Nakaangkon ang biktima og daghanang samad pinusilan sa nagkadaiyang parte sa iyang lawas. Gisulayan pa kini sa pagdala sa Rivera Hospital, Panabo City apan pagka-alas-4:30 sa hapon sa susamang adlaw, gideklara kining dead on arrival sa attending physician nga si Doctor Marianne Mae Lorenzo.
Padayon pa karon nga ginasuta sa kapulisan kung unsay motibo sa mga suspek sa maong krimen.
Samtang, mitanyag og reward money si Congressman Alan Dujali alang ngadto sa kinsang makatudlo sa pagpusil-patay sa bag-ong napili nga Brgy. kapitan.
Mukabat sa P500,000 ang reward nga ihatag gikan sa supporters ug mga higala ni Barangay Kapitan Saquian.