Ikaduhang public consultation sa pagpatukod og solar power plant sa Gensan malampuson

MALAMPUSON ang ikaduhang public consultation alang sa planong pagpatukod og 150 megawatts agrovoltaic solar power plant sa Barangay Mabuhay, Gensan sa pagpanguna sa founder sa maong proyekto nga si Yan Amante.

Gitambungan kini sa kapin 15 ka mga purok leaders, Barangay Council, City-ENRO, DENR, BFP ug NIA. Dinhi subling gipresenta ni Amante ang tumong ug tinguha sa maong proyekto na makahatag og de kalidad nga serbisyo ug makaangkon og baratong presyo sa power supply ingon man ang paghatag og trabaho sa mga residente sa duha ka Barangay nga mamahimong masakop sa proyekto nga mao ang Barangay Conel ug Mabuhay.

Subli niining gipasabot sa publiko nga ang maong proyekto ang dili mamahimong makaangkon og negatibong epekto sa kinaiyahan tungod aduna matud pa silay himuong reforestation o pagtanom og mga kahoy ug mga gulay nga mapuslan sa katawhan ug tungod importante matud pa ang lig-on nga pundasyon sa yuta alang pagpabarug sa mga solar panel.  

Gipaniguro usab ni Amante nga ilang ma-comply ang gi-address sa mga sakop sa City Environment and Natural Resources ug DENR kalabot sa hisgutanang reforestation o pagtanum og kahoy aron dili mamahimong ma apektohan ang kinaiyahan.

Kahibaloang ang maong proyekto ang rehistrado dinhi sa General Santos City ug dakong tabang matud pa sa paglambo sa ekonomiya tungod sa milyon-milyong buhis ang ilang mahatag sa gobyerno. Kahibaloang mukabat sa P498,407,109.67 ang mamahimong mahatag nga buhis niini sa ilang ika-8 ka tuig nga operasyon sa solar power plant kung ugaling mapatukod na ang mukapin sa 200,000 solar panels. I MJ Fernandez