LEGAZPI CITY – Makondusir nin imbestigsyon an Kongreso mapadapit sa problema sa 4Ps na nagkakawsa ki mga delay sa ayuda para sa mga tios na nangangaipo.
Segun ini kay House Committee on Appropriations Vice Chairperson Congressman Atty. Jil Bongalon, kun sain sinabi niya sa intrevista kan Brigada News FM Legazpi na ini nganing aramon kun ano pa an kinakaipuhan kan Department of Social Welfare and Development (DSWD) nganing maibetaran na an pagkakaigwa nin anuman na problema na nakakaapektar man sa mga benepisyaryo.
Tinawan-doon ni Bongalon, an programang ini, dapat na makatabang sa mga Pilipinong tios.
Sinabi pa kan lehislador, ipapaapod an mga opisyales kan DSWD asin kun madiskubreng igwa sindang kakulangan sa pagpautob o sa mga personahe, ini an ikokonsiderar sa saindang budget deliberation ngunyan na 2024.
Mientrastanto, segun pa saiya, posibleng sa bulan pa nin Mayo mapupunan an imbestigasyon nin huli ta igwa na sana sinda ki duwang semana nganing tapuson an session antes mag-Holy Week break.
Kun magigirumduman, nagpuon an problema kan makaresibe sinda ki mga reklamo na igwang delays sa 4Ps distribution o dai nakakaantos sa tamang panahon an cash grant na dapat nindang maresibe bulan-bulan.
Sinabi ni Bongalon na tulos ninda ining inaksyunan asin napag-araman na saro sa mga kawsa kaini an budget deficit na kun sain basado sa research ninda, nagkaigwa nin budget cut sa 4Ps sa 2023 budget asin nadiskubreng nilipat ni Senator Imee Marcos an pondo sa iba pang programa kan DSWD.