Nagpadayon ang gihimong imbestigasyon sa Makilala PNP kung unsay hinungdan sa pagkahulog sa usa ka pulis patrolman sa tulay atubangan sa Torreda Funeral Homes, Poblacion, Makilala, kagahapon sa udto, Nobyembre 27.
Kahinumdoman nga nakaplagan na lamang ala-una sa hapon ang patay’ng lawas sa biktima nga base sa nakuhang mga ID, giila kining si Patrolman Fraksedicio II Dauz Florentino, residente sa Cogon, Digos City, Davao Del Sur.
Sumala sa mga nakakita, ang direksiyon sa maong pulis padulong sa Poblacion, Makilala-Bansalan sakay sa iyang motorsiklo sa dihang nahulog sa tulay, apan wala pa masuta kung unsang orasa o kanus-a kini nahulog.
Duda ang mga residente nga anang gabii pa nadisgrasya ang maong biktima ug kagahapon lamang sa udto kini namatikdan.