Sambilog sa mga paagi agud malikawan ro election fraud kaparehu it vote buying, hay ro pagdugang sa presensya it kapulisan pinaagi it checkpoint operations.
Raya ro planong ubrahon it mga pulis sa Iloilo, pilang adlaw bago ro May 9 National ag Local Elections.
Ginmanduan ni Iloilo PNP director, Colonel Adrian Acollador, ro tanan nga chief of police ag force commanders nga pabaskugon ro pagpatigayun it random checkpoint ag chokepoint operations para malikawan ro dinaya sa eleksyon, eabi eon ro vote buying, vote selling ag harassment.
Mabahoe nga bulig para sa IPPO ro masobra 1,600 augmentation personnel para mapabaskug ro security measures sa eleksyon.
Sa makarun hay owa it nabatun nga pormal nga report o reklamo ro IPPO kaangot sa vote buying sa pihak it monitoring sa social media nga may pilang netizens ro naga-post it impormasyon kaangot sa pagbakae it boto.
Gin engganyo man ni Acollador ro publiko nga insigidang ireport sa police station ro anumang insidente it vote buying ag pagbaligya it boto agud mataw-an it aksyon ro mga tawong nagapatigayun it dinaya sa eleksyon. / ANN DESLENE SALAZAR