Patay ang isang pulis at kapatid nito matapos sumalpok ang sinasakyang motorsiklo sa isang forward truck sa Barangay Cabaggan, Pamplona Cagayan noong ika-31 ng Marso taong kasalukuyan.
Kinilala ang mga biktima na sina Patrolman Mario Martinez, 28-anyos, nakadestino sa Regional Mobile Force Batallion 2, at kapatid nito na si Mark Anthony Martinez, 30-anyos, construction worker na pawang residente ng Brgy. Centro 4, Claveria, Cagayan habang ang drayber naman ng forward truck ay si Rodolfo Mamauad, 54 anyos, at residente ng Brgy. Binalan, Aparri, Cagayan.
Sa imbestigasyon ng PNP Pamplona, galing ang magkapatid sa bayan ng Claveria at binabagtas ang pambansang lansangan sa Brgy. Cabaggan nang mawalan ng kontrol si Patrolman Martinez sa kanyang minamanehong motorsiklo at napunta sa kasalungat na linya ng kalsada dahilan upang masalpok ng paparating na forward truck.
Nagtamo ng malubhang sugat sa ulo at katawan ang mga biktima na agad namang naisugod sa pagamutan subalit idineklarang Dead on Arrival ng sumuring doktor.
Nagkausap na ang magkabilang panigĀ at nagkasundo sa pamamagitan ng amicable settlement at hindi na magsasampa ng kaso laban sa driver ng forward truck.