Aron nga masigurong luwas ang kaunong karne sa baboy ug isda, gitambagan sa Veterinarian’s Office (CVO) ang Dabawenyos nga sutaon kung duna ba kini Meat Inspection Certificate (MIC) ug Fish Inspection Certificate (FIC).
Labi na karong holiday season, kinahanglang masayran ang kalidad sa mga paliton nga karne ug isda aron nga dili mabutang sa peligro ang panglawas.
Sumala ni Dr. Corazon Sepulveda, Officer-in-Charge sa CVO, nga pinaagi sa MIC, makasiguro ang mga konsumante nga dili illegally slaughtered ang karneng baboy ug niagi sa antemortem ug post-mortem inspection, buot pasabot, luwas na kining konsumohon.
Dugang pa ni Dr. Sepulveda nga anaa kanunay ang presensiya sa mga meat inspector, meat control officers sa mga accredited nga slaughterhouses, kini aron nga masigurong luwas ang mga karneng baboy.
Samtang, gipahinumdoman sab ni Sepulveda ang publiko nga mangayo o pangitaon ang FIC kung mupalit og isda sa mga palengke.
Matud pa sa opisyal nga ang kolor sa unod sa tuna dili kanunay nagpasabot sa pagkapresko niini, dili tanang tuna adunay pula o pink nga kolor ang unod. Ang uban mas luspad tungod kay ang kolor niini nagdepende usab sa lokasyon diin nakuha ang isda, ug ang edad sa isda.
Gipasalig hinoon ni Sepulveda nga kadaghanan sa mga naninda og karne ug isda sa dakbayan nakaagi na sa fish-handling ug meat-handling seminars.