Mukabat sa kapin P100, 000 kantidad sa iligal nga droga ang nakompiska sa mga sakop sa Sta. Ana Police Station atol sa drug buy bust operation, alas-4:20 sa hapon, Enero 22, 2024 sa Purok 11, Brgy. Communal, Buhangin Dist., ning syudad sa Davao.
Ang mga dinakpan nailang sila Benjie Miranda Hermosura alyas “JAY-R”, 41 anyos, Heavy equipment operator ug residente sa Prk Santol, Sto. Niño, Panabo City, Island March Bugnos Apat, 34 anyos, nga taga-San Vicente Panabo City ug Edward Pillado Bugnos, 39 anyos, driver ug residente sa Purok 11, Brgy. Communal, Buhangin.
Nakompiska sa posisyon sa mga suspek ang kapin kon kulang 15.04 gramos sa gituohang shabu nga dunay Standard Drug Price nga Php 102,272.00, usa ka magazine ug 15 kabook bala sa 9mm pistol.
Paslak na sa bilangguan ang mga suspek ug gihikay na ang kasong ipasaka batok kanila.