Padayon nga ginapangita sang iya himata kag mga kapulisan ang Barangay Kapitan sang Brgy. Aglupacan, sa banwa sang Tapaz matapos nadula kag tubtob subong wala pa makapauli sa ila nga puluy-an.
Ginkilala ini kay Wennie Bluma Dimas, 29-anyos, residente sang nasambit nga barangay.
Sandig sa Tapaz Municipal Police Station, nagpadulong sa ila istasyon ang hinablos sang biktima nga si Cheryl Dimas Excel agud i-report ang natabo.
Suno diri, ulihi nga nakit-an ang nasambit nga Barangay Kapitan sa Brgy. Sinunod takna ala 1:00 sang hapon sang tinalikdan nga Setyembre 13.
Ginapahayag nga indi man makontak sang iya himata ang biktima.
Sa kasagsagan sang pagpinangita, nakabaton sila sang report nga narekober sang isa ka residente nga ginkilala kay Herminio Gilbaliga ang pila ka identification cards kag mga importante nga dokumento sang biktima sa higad sang Panay River sa Brgy. Garcia sa amo man nga banwa.
Sa karon, blanko sa gihapon ang pamilya kun sa diin na ang biktima kag padayon naman ang imbestigasyon sang mga kapulisan sa nasambit nga insidente.