Kapulisan gireklamo og torture sa pamilya sa drug suspect

GIREKLAMO sa usa ka pamilya ang kapulisan human gidakop ug gikulata ang usa sa miyembro sa ilang pamilya. Matud ni Edmar Ewican, taga Spring, Alabel,

Huwebes sa gabii dihang gidakop ang iyang igsuon nga si Edward, 29-anyos. Mopalit unta kini og tubig ug sud-an sakay sa motor sa Barangay Poblacion kauban ang usa pa.

Apan pag-abot sa palugsong sa Cogonal, didto kini gidakop sa mga nakasilbilyan nga mga lalaki ug gipasakay sa itum nga hilux. Sa text nga gipadala ni Edward sa iyang misis, gidala siya sa hilit nga bahin sa Barangay Maribulan, didto gikulata.

Gibutangan og masking tape ug gipiringan ang mata rason sa pagkaangkon og bun-og ug dili na halos kalakaw. Apan migula sumala pa sa medical certificate nga walay naangkon nga physical injury si Edward dihang gibutang sa selda sa Alabel PNP.

Sa bahin ni PMajor Wesley Matillano, hepe sa presinto gidakop si Edward sa sakop sa Provincial Police Drug Enforcement Unit (PDEU) pinaagi sa drug buy bust operation human kini napalitan og putos sa pinugang dahon sa marijuana.

Naabot sa presinto sumala pa ang dinakpan alas-11 sa gabii tungod dugay nahuman ang inventory nga gitambongan sa opisyal sa barangay ug media. Natural lang sumala pa ang gasgas sa lawas si Edward dungan sa palugnot niini atol sa pagdakop.

Si Edward ang lakip sa Directorate for Intelligence (DI) drugs watchlist. Samtang silang tubagon ugaling mopasaka og reklam ang pamilya. Gikasuhan na usab sa kapulisan og pagsupak sa section 05 sa Republic Act 9165 o Comprehensive Dangerous Drugs act of 2002 ang dinakpan. ( Richel Gubalani)