Ginpahayag it Provincial Health Office-Aklan nga nakarekord ro probinsiya it 1,339% nga pagtaas it mga kaso it indibidwal nga gintamaan it dengue infection.
Dugang pa sa datos, umabot sa 403 kaso it dengue ro nairekord halin Enero 1 hasta Hulyo 30 kumpara sa kapareho nga tiempo ku nagtaliwan nga dag-on nga may 28 kaso eamang.
Nagapanguna ro banwa it Ibajay sa may pinakamaabo nga kaso nga nagaabot sa 94, ginsundan it Nabas nga may 72, Kalibo nga may 55, Malay nga may 41, Buruanga nga may 25, Numancia nga may 16, Banga nga may 15, Makato ag Libacao nga may tig-14, ag Malinao nga may 13 ka mga kaso.
Ginkumbinse man it PHO-Aklan ro publiko nga himuon ro tama nga mga tikang nga malikawan ro nasambitan nga sakit./JIL B. LACSON