GIKABALAKA karon sa labaw sa kapulisan sa GenSan ang pagsaka sa ihap sa kaso sa pagpanglugos nga natala sa mga presinto.
Sa datus gikan sa General Santos City Police Office (GSCPO) siyam na ka kaso sa lugos ang natala karong tuig samtang 62 ang narekord atong 2023. Usa sa nakita sa kapulisan nga hinungdan sa pagsaka sa ihap sa kaso sa rape mao ang pagsumbong na sa nabiktima sa pagpangabuso sa kapulisan. Dungan sa gipakusog nga Public Community Relation sa kapulisan, butyag ni Police Col. Nicomedes Olaivar Jr., director sa GSCPO.
Sa imbestigasyon, migula nga sagad nahitabo ang pagpangabusong sekswal sulod sa panimalay. Sagad usab nga lambigit sa pagpangabuso mao ang kaila o kabanay sa biktima.
Apela na lang ni Olaivar sa mga ginikanan nga siguradohon nga protektahan ang anak batok sa mga personahe nga posibleng makapasakit sa mga anak. I Richel Gubalani