Kaso sa Typhoid sa Northern Mindanao, misaka!

Mas gipakusgan karon sa Department of Health Northern Mindanao ang “active surveillance” aron mapugngan ang pagsaka sa kaso sa typhoid sa rehiyon.

Sumala ni DOH-10 Research Epidemiology and Surveillance Disaster Response Unit Medical Officer IV Dr. Stephanie Grace Zamora nga basi sa data, as of April 2023 dunay 545 kaso, mas taas tandi sa 259 nga kaso nga natala sa 2022 sa susama nga panahon.

Kini nagpasabot nga dunay 102.60% nga pagtaas sa kaso sa Typhoid sa rehiyon. Tungod niini, gihimo nang matag semana ang gahimuon nga disease supporting units sa DOH Regional Office 10.

Una nang migawas sa data sa DOH national nga lakip ang Northern Mindanao sa tulo ka rehiyon sa nasod nga dunay pagtaas sa kaso sa Typhoid.

Kahibaloan nga ang Typhoid, usa ka impeksyon nga gikan sa usa ka klase sa bacteria nga mukatag pinaagi sa kontaminadong pagkaon ug tubig diin sintomas niini mao ang pagluya sa lawas, sakit sa tiyan, labad sa ulo, diarrhea o constipation ug pag-ubo.

Awhag karon ni Dr. Zamora sa mga tawo nga nakasinati sa sintomas, labi na ang hilanat nga mulapas og tulo ka adlaw nga dili gaka-alibyohan nga magpakonsulta gilayon sa doktor.