LEGAZPI CITY – Nagsagibo nin rally kasuudma an manlain-lain na organisasyon sa probinsya kan Albay tanganing rumdumon an mga inagihan sa panahon ni Former President Ferdinand Marcos, Sr. katakod kan ika-38 taong anibersaryo kan EDSA People Power.
Segun kay Kabataan Partylist Bicol Regional Spokesperson Dani De Jesus, ini komo pagrumdom sa buhay na nawara sa panahon ni Marcos, Sr. asin panimbagon an mga Marcos sa mga pang-aabuso.
Apwera digdi, kaibahan man sa saindang pinaglalaban iyo an mapadapit sa pigbubusol na Charter Change.
Kadakol kaya ki namamateang krisis sa nasyon siring kan kagutuman, kawaran nin trabaho, pagtios, kawaran nin maray na sistema sa edukasyon asin kadakol pan iba na dapat mas tutukan kaysa an pag-amyendar sa Konstitusyon.
Mientrastanto, tinawan-duon pa ni De Jesus an mapadapit sa ‘no to campus militarization’.
Kun tutuuson kaya, safe zone dapat kan mga estudyante an mga eskwelahan, kaya dai kaipuhan ki presensya kan mga militar asin kapulisan.
Apwera man digdi, kontra man su boot sinda sa mandatory ROTC na pigbubusol kan administrasyon.