LAING barangay na usab ang gisulod sa Brigadahan GenSan sayo sa buntag, Mayo 24 adlaw nga Lunes aron itagtag ang mga ayuda nga nagikan gihapon sa libuan ka mga miyembro nga naluoy sa ilang kaubanan nga naigo sa pagbaha milabay nga semana.
Alas sais pasado sa buntag, usa sa gisulod nga lugar ang Puting Bato sa Brgy. Calumpang kung asa 64 ka mga KaBrigada ang nakadawat og ayuda.
Usa dinhi si Heremia Salindo, hingkod ang pangidaron may dala siya nga card isip pamatuod nga miyembro sa KaBrigadahan GenSan, duha ka putos ang iyang nakuha nga ayuda, may sulod grocery items ug may pakapin pa nga mga sanena gikan usab sa mga donors.
Daku ang katawa ni Salindo gumikan sa kalipay ug nagapasalamat kini sa nagpasiugda sa KaBrigadahan GenSan, kon wala siya na miyembro wala unta siyay madawat nga grasya adlaw nga Lunes.
Nagatestimonya usab si Rudy Resma nga maayo gayod ang resulta sa iyang pagpamiyembro sa KaBrigadahan GenSan mao nga iyahang nasulti nga maayo gayod ang programa nga gipasiugdahan ni Idol Brigada Elmer Catulpos.
Samtang usa sa coordinator sa KaBrigadahan GenSan sa Calumpang mao si Shane Cadel, nagasulti nga silang mga coordinator nagtampo usab sa ilang resources aron idugang sa ayuda sama sa bulad nga madugang sa konsumo sa kapwa miyembro bisan sa law-uy aduna nay panud-an.
Sa ulahing datus sa KaBrigadahan GenSan ang laing nakadawat ug ayuda, 38 ka miyembro gikan sa Purok Malinawon u Purok Paradise Tambler 41. ( Ever Diazon)