LEGAZPI CITY – Arestado an sarong lalaki sa Purok 1, Brgy. It-Ba, banwaan kan Manito, Albay huli sa kasong frustrated homicide.
An suspek, sarong singkwenta y otso anyos na paraoma, warang agom asin residente kan Purok 6, Relocation Site, Sitio Inang Maharang, Brgy. Nagotgot kan nasambit na banwaan.
Sa report kan pulisya, inarestar kan mga personahes kan Manito MPS an suspek sa kusog kan mandahamiento de aresto para sa nasambitan na kaso na pirmado kan Agosto 18 kan nakalihis na taon sa irarom kan Criminal Case No. 17176.
Maabot man sa PHP72,000 an kantidad nin piyansang inirekomendar saiya kan korte para sa temporamenteng libertad.
Sa presente, kapot na ini kan nasambit na hepatura para sa magkakanigong disposisyon.