Padayun pang giila sa kapolisan ang duha ka mga responsableng mipusil sa usa ka lalake diha sa purok 4, Agong Canitoan ning siyudad sa Cagayan de Oro, kagahapon.
Naila ang biktima nga si Jose Manggubat Jr, 39 anyos, usa ka electrician, ug residente sa nahisgutang dapit.
Matud ni Police Station 7 Commander Major Peter Tajor, basi sa ilang nakuhang impormasyon, pauli na ang biktima sa ilang pinuy-anan angkas ang iyang igsoon dihang gisundan sila sa mga suspek sakay sa mio nga kolor gray ug didto gihimo ang pagpamusil gamit ang calibre 45 nga armas.
Upat ka igo-pinusilan ang nahiagoman sa biktima sa liog ug likod nga bahin nga maoy hinungdan sa iyang kamatayon. Nasayran sab nga bulag sa iyang legal wife ang biktima ug duna kini bag-ong kaipon.
Nangayo na usab og footage ang kapolisan sa mga tag-iya sa CCTV dool sa crime scene aron maila ang mga suspek.
Samtang, nanawagan si Police Major Tajor sa kooperasyon sa katawhan aron daling mahatag ang hustisya sa pamilya sa biktima.