Nagapabilin sa Tapaz Municipal Police Station ang isa ka lalaki matapos ginbuno sang iya abyan sa Barangay San Francisco, Tapaz, Capiz takna alas 9:30 kagab-i sang Lunes, Disyembre 25.
Ginkilala ang biktima kay alyas Daniel, 31-anyos, wala sang trabaho kag residente sang Barangay Lagdungan sa nasambit nga banwa.
Samtang ang suspek amo si alyas Xian, 26-anyos, utility sang Tapaz District Hospital.
Sandig sa imbestigasyon sang Tapaz PNP, samtang nagainom-inom sang makahulubog nga ilimnon ang biktima kag suspek kaupod ang iban nila nga abyan sa isa ka baligyaan malapit sa national road sa Barangay Lagdungan sang hinali lang may nagpatunga nga indi pag-intindihanay sa duha.
Bangud sa natabo, nagdesisyon ang biktima nga maglakat nalang apang ini ang ginlagas sang suspek kag ginbuno sa nawala nga abaga kag sa natuo nga porsyon sang hawak.
Madasig naman nga nagpalagyo ang suspek matapos ang nakumiter nga krimen.
Gindala naman ang biktima sa pinakamalapit nga ospital sang iya pamilya para sa nagakaigo nga pagbulong.
Nadakpan ang suspek takna alas 10:45 sang gab-i sa Barangay San Francisco kag ini sa karon ang yara na sa kustodiya sang Tapaz PNP para sa nagakaigo nga disposisyon. | Judy Ann Juare