Nadugmok ang ulo samtang ang lawas natunga sa usa ka senior citizen human aksidente nga naigo sa naghaguros nga trailer truck alas 10:15 sa buntag niadtong Mayo 5, 2024 sa SRP Road Mambaling sa dakbayan sa Sugbo.
Ang biktima mao si Consolacion Dinalo Rosal, 65-anyos lumad taga Samboan, Cebu ug kasamtangang nagpuyo sa Brgy. San Roque dakbayan sa Talisay.
Si Rosal giingong nilabang sa dapit aron unta mag atang og bus sa atbang nga karsada. Matud sa pamilya nga nananghid kini nga magpa-ayo sa selpon.
Samtang ang driver sa trailer truck giila nga si Gregorio Canonero Geoco 47anyos, minyo ug nagpuyo sa Balud San Fernando, Cebu
Sa imbestigasyon sa Traffic Enforcement Unit sa Cebu City Police Office, pinaagi sa taho ni Police Staff Sargeant Jacinto A. Arnado Jr. ang driver nagsubay sa SRP road padung sa Minglanilla dihang nisaka na kini sa taytayan sa boundary sa Cebu City ug Talisay City aksidente nga naigo ang usa ka pedestrian nga si Rosal nga mitabok sa maong taytayan
Dali unta nga niresponde ang mga rescuers apan tungod sa kadaot sa lawas ug ulo nga nahiagoman sa biktima diin pipila ka parte sa lawas niini ang nadugmok ug nabuwag sa lawas, gideklarar kini nga wala nay senyales sa kinabuhi.
Boluntaryo nga nitahan sa iyahang kaugalingon sa PNP Talisay.
Si Police Corporal Ariel Balde sa Traffic Office uban sa CT-TODA mitugyan sa driver ngadto sa Traffic Enforcement Unit sa Cebu City Police Office.
Matud pa sa driver nga si Geoco atol sa hitabo adunay nag-una niya nga laing sakyanan og wala siya makabantay nga adunay tawo nga mitabok sa dan nga sa iyang pagduda nasalipdan sa sakyanan nga nag-una kaniya.
Diha na siya nasayud nga siya nakadasmag ug naka ligis human mi paka ang atubangan sa iyang gimanehong truck.
Giingong naka brake ang driver apan matud niini nga tungod sa kabug-at sa sakyanan wala dayon kini makahunong hinungdan nga nalatayan gyud sa ligid ang biktima.
Kasamtangan nga gitanggong ang driver sa TEU samtang gihikay ang tukmang kaso nunot sa kamatayon sa iyang naligsan patay kon “RECKLESS IMPRUDENCE RESULTING IN HOMICIDE.” | Alan Tangcawan