LEGAZPI CITY – Pigsiyerto kan Legazpi City Office of the City Environment and Natural Resources (OCENR) na dai makakaapektar sa salud kan mga residente an pyrolysis and gasification system na pigpaplanong ibugtak nganing magin zero-waste an syudad.
Sa intrevista kan Brigada News FM Legazpi kay OCENR head Benju Calleja, sinabi niya na an nasambit na plano, resulta kan saindang mga pag-orolay asin pag-aadal kun mabugtak pa ki panibagong mga cell sa sanitary landfill.
Sa ebalwasyon ninda, masasayang sana an pagrugaring kan LGU kun pirming mabugtak ki mga cell sa landfill.
Kaya an napag-olayan iyo an nasambit na sistema o sarong alternatibong disposal facility, kun sain ikakaag digdi an mga residual wastes, asin susuluon gamit an halangkaw na temperature saka magigin abo.
Maray su boot ini kaysa mag-okupar pa ki espasyo para sa sanitary landfill.
Igwa man su boot ini ki engineering intervention, kun sain pasado man ini sa air quality kaya dai man maaapektaran an salud kan lambang saro.
Mientrastanto, target ninda ibugtak an nasambit na pasilidad sa Brgy. Taysan.