Magapatigayon sang libre nga Surgical Mission ang gobyerno probinsyal sang Capiz sa bulig sang mga dekalidad nga doktor gikan sa St. Luke’s Medical Center nga pagahiwaton sa Roxas Memorial Provincial Hospital halin Agosto 24 tubtob 26, 2023.
Inisyatibo ini ni Governor Fredenil Castro agud mabuligan ang mga indibidwal nga wala sang ikasarang nga mag-paopera sang ila ginasupreher nga balatian.
Sa interview sang Brigada News FM Roxas City kay Dr. Alex Nolasco, Provincial Health Officer II, iya ginpahayag nga nagpatigayon na sang free-screening sa mga pasyente nga mahimo mangin benepisyaryo sang amo nga mission kun sa diin may yara lamang sa 50 tubtob 60 ka mga pasyente para major surgery ini amo ang sakit sa bato, goiter, appendix, Prostate cancer, ect. kag 50 tubtob 80 naman ka mga pasyente para sa minor surgery ini amo ang bukol-bukol, sungi and etc. ang iga-cater sang mga doktor.
Samtang ang Operation Tuli ang pagatutukan naman sang grupo sang mga doktor sa Capiz nga pagahiwaton man sa RMPH.
Suno naman kay Gov. Fredenil Castro, nga nagkomunikar sa iya ang pamunuan sang St. Luke’s Medical Center rason nga iya ginpalab-ot ang problema sang Capiz nga may yara sang kakulangan sa doktor, equipment kag hospital kun sa diin madamo man sang mga pumuluyo ang nagakinahanglan sang bulig.
Gintuad man ni Castro, nga wala nagpangduha-duha ang nasambit nga hospital nga magpadala sang bulig. Ini ang rason kun ngaman magapatigayon sang libre nga surgical mission. | Judy Ann Juare