Madalas na presensiya ng HPG sa mga kalsada walang kinalaman sa paparating na eleksyon

CAMARINES NORTE- Nilinaw nang PNP Highway Patrol Group na walang kinalaman sa paparating na eleksyon ang madalas nilang presensiya sa kalsada.

Kapansin- pansin kasi na kung dati ay isang beses lang sa isang linggo naglulunsad ng operasyon ang “Guardians of the Highway” o ang tinawag nitong Oplan Lambat Bitag Sasakyan, ngayon ay nagiging madalas na ito kung hindi man araw- araw.

Sa panayam ng Brigada News FM Daet, ipinaliwanag ni Police Major Joselito Quila, Provincial Officer ng HPG sa Camarines Norte na isang beses lang talaga dapat kada isang linggo ang pagsasagawa ng Oplan Lambat Bitag Sasakyan.

Pero para umano hindi sila napuwe- pwersa sa iisang araw lang ay ginagawa na lamang aniya nila ng mas madalas.

Katuwang ng HPG sa naturang operasyon ang local police at enforcers.

Paalala ni Quila sa mga motorista na upang maiwasan ang problema ay sumunod na lamang sa batas para na rin sa kaligtasan ng lahat.

Aniya, mas mainam na araw- araw silang nakikita sa kalsada kaysa naman walang makikitang awtoridad.

“Ituwid lang po ninyo ang inyong mga sasakyan, ang inyong sarili huwag lumabag sa batas at mas maganda nga po na araw araw nakikita niyo kami sa kalsada kaysa po wala kayong nakikitang awtoridad,” ani Quila.

Maliban naman sa pagpapatupad ng batas ay mayroon ding mga Barangayanihan activities ang HPG tulad ng pagsuporta sa Brigada Eskwela, tree planting at iba pa.

(Photos: PNP HPG)