Wala nay kinabuhi nga nagbuy-od ug naligo sa kaugalingon nilang dugo ang mag-amahan human giratratan og M16 rifle sa duha ka wala mailhing kriminal alas 8:20 kagabie sa Prk. 1 Concepcion Maco Davao de Oro.
Sa report gikan sa Maco MPS, giila ang mga nakabsan nga sila si Arman Pacaldo Demecillo Sr., 49-anyos, minyo kanhing CAFGU/CSU Maco; ug anak niini nga si Arman Pasco Demecillo Jr., 26-anyos dunay kapuyo, kanhing CAFGU nga residente sa maong lugar.
Sa imbistigasyon, nagpahayahay ang mag-amahan gawas sa ilang balay dihang dunay niabot nga tulo ka lalaki sakay sa motorsiklo og nisulod sa compound dayon nideretso sa mga biktima ang duha bitbit ang ilang tag-as nga kalibre sa armas.
Unang gipusil ang amahan dayon gisunod ang anak nga nakadagan pa sa kusina apan gisundan kini og mga bala.
Narekober sa crime scene ang daghang basiyo sa bala samtang naglusad dayon og hot pursuit operation ang kapulisan.
Motibo sa insidente ug identity sa mga suspek ang padayon pangĀ gisubay sa otoridad.