Midangoyngoy sa paghilak ang mag-amahang Bitoon sa dihang nakita ang patay’ng lawas ni Agnes Bitoon, isa sa mga natabunang buhi sa nahitabong pagdahili sa yuta kagahapon sa buntag, Enero 18, 2024 sa Prk. 20 Barangay. Mt. Diwata, Monkayo, Davao de Oro.
Wala kapugngi ni Reneboy Sr. ug Jr. ang kaugalingon og labihang hilaka sa dihang nahaw-as gikan sa pagkalubong sa yuta ang inahan alas-12:23 kagahapon sa udto.
Sa dihang nahinabi sa Brigada news Team si Reneboy, asawa ni Agnes, nakasinggit pa ang iyang asawa sa dihang midahili na ang yuta hinungdan nga iyang gi-una ang mga apo ug nakagawas sa lugar nga luwas.
Gisulayan pa niya og balik si Agnes, apan natabunan na sa yuta ang panimalay diin didto nagtapok ang mga nag cell group.
Kagahapon sa udto, gawas ni Agnes Bitoon, nahaw-as na usab ang patay’ng lawas nila ni Elvera Saldua ug Ritchell Reboldad.
Una na nga nakuha ang pito ka mga patay’ng lawas nila ni Catherine Gumatin, 27, Hannah Gumatin, 9, Dysna Gumatin, 3, Arjay Gumatin, 1, Cristelle Gumatin, 10, Ailee Gumatin, 8, ug Marjomie Nenaria 33.
Samtang, nalisdan usab ang mga rescuers sa gilusad nila nga search and retrieval operation gumikan humok ang yuta, pun-an pa ang pagbundak sa ulan, hinungdan nga tiwason karong adlawa ang retrieval operation aron nga makit-an na ang biktimang si Rommel Gumatin.
Samtang, gipahiluna ang mga patay’ng lawas sa mismong simbahan sa Assembly of God sa Brgy. Union, sa maong Lungsod.