Pilason ang isa ka magulang matapos ginlabo sang kaugalingon nga manghud sa Brgy. Balingasag, Cuartero, Capiz takna alas 7:30 kagab-i sang Dominggo, Oktubre 8.
Ginkilala ang biktima kay alyas “Nestor” samtang ang suspek amo si alyas “Virgilio” lunsay yara sa legal nga pang-edaron, kag mga residente sang nasambit nga lugar.
Sa interview sang Brigada News FM Roxas City kay PEMS Reneta Abraham, OIC sang Cuartero Municipal Police Station, iya ginpahayag nga nagikan ang mag-utod sa isa ka okasyon kun sa diin nagpauli ang mga ini nga hubog, pag-abot sa ila balay hinali nalang nagluntad ang indi pag-intindihanay.
Ginapahayag nga nagkuha sang talibong ang manghud kag ginlabo ang magulang sa ulo, braso kag likod.
Ginpadangat sa Dao District Hospital ang biktima para sa nagakaigo nga pagbulong.
Samtang ginkustodiya naman sang Cuartero PNP ang suspek para sa nagakaigo nga disposisyon.
Kahulugbon ang ginalantaw nga motibo sang mga kapulisan sa nasambit nga insidente.
Sa karon, wala naman sang plano ang magulang nga magpasaka sang kaso batuk sa iya manghud. | Judy Ann Juare