Himas-rehas ngayon ang dalawang (2) lalaki matapos ang ikinasang drug buy-bust operation ng pinagsama-samang pwersa ng mga awtoridad sa Barangay Ilayang Iyam, Lucena City nitong gabi, Marso 6.
Bandang alas-9:09 ng gabi nang madakip ang mga suspek na kinilalang sina alyas “Macho”, 43-anyos at alyas “Jugs”, 29-anyos, matapos makabili ang isang poseur buyer ng hinihinalang shabu mula sa kanila.
Sa gitna nito, nasamsam kay alyas Macho ang isang (1) genuine 1000 peso bill at ang boodle money na ginamit sa operasyon habang nakuha naman kay alyas Jugs ang hinihinalang shabu na tinatayang nagkakahalaga ng mahigit ₱1,700,000.
Sa ngayon, nasa kustodiya ng Lucena City Police Station ang mga suspek na nahaharap ngayon sa kasong paglabag sa Republic Act 9165 o Comprehensive Dangerous Drugs Act of 2002.