PATAY ang usa ka mananagat sa GenSan human gipusil sa katagay nga pulis sa Purok Saeg, Barangay Calumpang, Miyerkoles sa kadlawon.
Giila ni Police Col. Nicomedes Olaivar Jr., director sa GenSan City Police Office (GSCPO) ang gipatay nga si Marvin Bahian, 19-anyos, nagpuyo sa lugar.
Samtang ang gitudlong mipusil mao si Police Corporal Ekinne Semilla, nadestino sa Palimbang, Sultan Kudarat Municipal Police Station ug nagpuyo sa lugar asa nahitabo ang krimen.
Matud ni Olaivar, nagkauban sa pagtagay sa lugar ang duha nagkalalis ug didto na nahitabo ang pagpamusil.
Human sa insidente, gilayong misibat si Semilla palayo sa lugar samtang narekober sa kapulisan sa balay sa pulis ang issued firearms nga gigamit sa krimen.
Nanawagan usab ang pamilya ni Bahian sa pulis nga mosurender na aron mahatagan og hustisya ang pagpakamatay sa ilang kabanay sa kamot sa maong pulis.
Sa karon, padayon ang hot pursuit operation sa kapulisan sa GenSan ug Sultan Kudarat aron masikop ang nasangpit nga pulis. I Richel Gubalani