NABALHOG sa selda sa kapulisan sa GenSan ang usa ka mananagat human kini madakpan sa drug buy-bust operation, sa Litanville, Brgy. Sinawal, GenSan, alas 2:30 sa kadlawon, Mayo 7.
Giila sa kapulisan ang suspek kang alyas Ada, 49-anyos, residente sa nahisgotang lugar.
Gikonsidera matud pa sa otoridad ang mananagat nga usa ka street level individual o SLI gumikan sa pagkalambigit niini sa gidiling droga.
Nanguna sa operasyon ang GSCPO- City Police Drug Enforcement Unit kuyog ang mga personahe sa Makar police station ug PDEA-12.
Napalitan matud pa sa police poseur buyer ang suspek og 27 ka putos sa gitoohang shabu ug Php1,000 nga buy bust money.
Sa kasamtangan padayon pang gisuta ang kinatibuk-ang kantidad sa iligal nga droga nga nakompiska sa mananagat.
Gihikutar na sab ang kasong kalabutan sa iligal nga droga batok sa dinakpan. I Enamie Mogpon