KALIBO, AKLAN—Ginsuspende anay it LGU Malay do pag-require it antigen test sa mga Aklanon workers nga magatabok sa isla it Boracay maghalin sa mainland Aklan.
Suno sa LGU Malay, nangin epektibo do nasambit nga suspension umpisa nga ginpaidaeom sa modified enhanced community quarantine do bilog nga probinsya it Aklan.
Kaangot kara, puwede man eon nga makasueod sa isla do mga non-Malaynon workers nga owa pa nabakunahan kung do mga raya hay may buyot nga letter request maghalin sa andang establishementong ginatrabahuhan nga ginapabalik eon sanda sa trabaho.
Nasayuran nga una eon sa 78% nga mga tourism workers do nabakunahan kontra sa COVID-19.
Sa pihak nga parte, owa man it bisita nga ginapasugtan sa makarun sa isla bangud sa mga restrictions nga ginapatuman sa lugar nga una sa idaeom it MECQ. // SHERRY ANNE REUNIR-VIDAL