Patay ang isa ka mangunguma matapos ginpulihan-buno sang mag-utod nga laborer sa Brgy. Maralag, Mambusao, Capiz.
Ginkilala ang biktima kay alyas Joan, 46-anyos, lalaki kag may asawa, samtang ang mag-utod kag ginatudlo suspek amo sanday alyas Albert, 34-anyos kag alyas Joe, 36-anyos, lunsay mga residente sang nasambit nga barangay.
Sa interview sang Brigada News FM Roxas kay Police Lieutenant Shaney Allanic, hepe sang Mambusao Municipal Police Station, iya ginpahayag nga nagikan sa binaylihan ang biktima kag magapauli na kuntani, apang ini ang ginbantayan sang mag-utod kag ginpulihan-buno.
Nag-angkon sang madamo nga pilas sa kalawasan ang biktima nga gintunaan sang iya kamatayon.
Suno kay Allanic, nadakpan ang mga suspek sa Brgy. Balit matapos ang ginpatigayon nga hot pursuit operation sang mga kapulisan.
Narekober sa mag-utod ang duha ka kutsilyo nga nagahaba sang 10.5 inches kag isa ka unit sang motorsiklo.
Sa karon, nagapabilin na sa kustodiya sang Mambusao PNP ang mag-utod kag natalana nga pasakaan sang nagakaigo nga panumbungon. | Judy Ann Juare