Maot nga serbisyo sa pipila ka mga resort sa Samal, gitagad

Duna nay gilatag nga solusyon ang Island Garden City of Samal LGU kalabot dili maayong serbisyo nga tanyag sa mga resorts ug tourism establishements ngadto sa ilang mga bisita.

Sumala kang Konsehal Gie-arr Requina Valdez, ayha pa man nilugwa ang reklamo sa usa ka transwoman nga nakasinati og diskriminasyon ug dili maayong pagtratar, nakahimo na og solusyon ang City Council sa IGACOS sa miaging semana tungod sa dili maayong serbisyo  sa ubang resorts.

Pipila sa mga rekomendasyon sa Tourism Committee sa City Council mao ang paghatag og warning sa mga resorts pinaagi sa Tourism Office nga dili maayo ang customer service treatment o handling sa mga turista.

Pagpahigayon og Proper Customer Service Handling Training o seminar aron mahimong  tourist-friendly ang Samal Island.

Ikatulo sa rekomendasyon, ang pag-require sa mga resorts  nga magbaton og FB page aron mas dali ma-access ug mamonitor ang review ug feedback sa mga kustomer o kliyente kung maayo ba ang pagtratar.

Gilasalig usab nga gihatagan og pagtagad sa lokal nga panggamhanan sa IGACOS ang susamang isyu ilabi pa nga ang turismo ang nag-unang tinubdan sa ekonomiya sa isla.

Kahinumduman nga gipadangat dinhi sa Brigada News Fm Davao sa usa ka Shannon Remotigue Gonzaga ang iyang kadismaya human nakasinati og dili maayong pagtrato gikan sa empleyado og mismong pamunuan sa Isla Reta.

Labihan ra matud pa ka “homophobic”  ug “transphobic” ang ubang empleyado sa maong resort busa nasubo kini dili lamang sa iyang kaugalingon apan lakip usab ang uban nga sama niyang myembro sa LGBT community nga posible unyang makasinati og diskriminasyon kung dili hatagan og pagtagad.BNFM-DAVAO