LEGAZPI CITY – Manlain-lain na mga aktibidad an pigkondusir sa syudad kan Legazpi kasuudma, Setyembre 21, katakod kan pagkokomemorar kan ika-51 anibersaryo kan Martial Law.
Kaibahan digde an Martsa Rally na pinagpartisiparan kan manlain-laing sektor.
Nagpuon an rally sa may BRHMC hasta sa Peñaranda Park kung sain nagkaigwa man nin programa.
Kasabay digdi an pagsingil kan coconut farmers sa tinuga kaidto kan administrasyong Marcos na coco levy.
Sa intrevista kan Brigada News FM Legazpi kay Nica Umbao, Regional Coordinator kan Bicolana Gabriela, sinabi niya na obheto kan pagkokomemorar sa inimplementar na martial law ni President Ferdinand Marcos, Sr. kan Setyembre 21 taon 1972, sarong pagiromdom na totoo an nangyaring pagbalgar sa karapatang pantawo kan nagkapirang mga Pilipino.
Padagos kaya na pig-aatubang hasta sa ngunyan an isyu dapit sa historical revisionism, fake news asin white washing kan history na kagibo man sana kan gobyerno. Mawot man kaining ipagiromdom an ribo-ribong mga Pilipino na nagin biktima kan oppression.