MASS testing ug paspas nga pagbakuna ang panawagan sa mga doktor sa GenSan dungan sa padayong pagsaka sa kaso sa Covid-19. Matud ni Dr. Bing Caballero Aquino, miyembro sa Socsksargen Internist (SIS) ug Philippine Medical Association (PMA) sa dakbayan dako og matabang ang ‘mass testing’ tungod daghang mga tawo ang nalibot- suroy sa siyudad ang ‘asymptomatic’ rason sa pagsaka sa kaso.
Makatabang usab ang paspas unta nga vaccination drives kontra Covid-19 aron dayong makab-ot ang ‘herd immunity’. Gipangayo usab niini ang pagdugang og health care workers ug Covid-19 facilities ug mechanical ventilators sa mga ospital.
Ang pamahayag ni Aquino ang dungan sa gigunitang datus nila asa napatik nga naa na sa 24-25% ang positivity rate sa GenSan. Ang positivity rate mao ang porsyento sa tanang coronavirus tests nga gihimo ug nasuta nga positibo. Makita usab niini ang indikasyon kung unsa na grabe ang COVID-19 infections sa lugar.
Una nang, gibutyag ni Dr. Ryan Aplicador, chief of hospital sa Dr. Jorge P. Royeca Hospital (DJRH) ug deputy incident commander sa Inter- Agency Task Force on Covid-19 naa na sa full capacity ang hospital bed ug ICU sa mga Covid-19 referral hospital sa GenSan. (Richel Gubalani)