LEGAZPI CITY – Nagkondosir an Albay Provincial Health Office (PHO) nin mass vaccination duman sa nairehistrong close contacts kan menor de edad na nagadan kawsa kan rabies sa Pio Duran, Albay.
Sa datos kan opisina, nasa 20 katawo an close contacts asin tulos na natudukan ki bakuna kontra rabies.
Sa ngunyan, padagos pang inoobserbaran an mga inireneksyunan.
Magigirumduman, segun sa MDRRMO kan banwaan, sarong syete anyos na aki an nagadan kan nakalihis sanang Domingo huli sa kagat ki ayam na may rabies.
Kan Disyembre 10, 2023 pa palan nakagat an biktima alagad dai man naireport kan mga magurang sa otoridad.
Hasta sa dinalagan sa ospital an biktima ngunyan na bulan huli sa mga nahiling na sintomas nin rabies siring kan takot sa tubig asin paros alagad nagadan man sana.
Apwera pa kaini, an mga nagluwas na persons of interests o close contacts, enot nang nagsayuma sa MDRRMO na magpabakuna huli ta wara man su boot sindang sintomas.
Mientrastanto, sa ngunyan, padagos man an sinasagibong lakdang kan MDRRMO pati man an Provincial Veterinary Office nganing dai na mautro pa an insidente.