Umapela si Mayor Jeserel Templonuevo kay Vice Mayor Ogie Enero II nga aprubahan eon ro andang 2024 budget sa banwa it Numancia, Aklan.
Para mataw-an it kaklaruhan ro isyu sa budget sa banwa it Numancia, ginhayag ni Mayor Templonuevo nga Oktubre 2023 hay nagsumite imaw sa opisina it Sangguniang Bayan it kopya it annual budget para sa dag on 2024 para sa naga kadapat nga aksyon.
Nasayuran halin sa alkalde nga hasta makarun hay bukon gihapon it aprubado ro budget it Numancia para sa dag on 2024 bangud pirmeng owa it quorum kung may session ro SB.
Nagpadaea eonman segun it tatlong follow up communication si Mayor Templonuevo sa opisina it SB para makapangayo it update ag para umapela nga aksyunan eon ro budget 2024.
Nai-intindihan segun it alkalde nga responsibilidad it Sanggunian ro pag review sa budget, pero nagapati man segun imaw nga trabaho man nanda bilang public servant nga madasig nga aksyunan ro makarondaya nga transaksyon bangud raya hay nakaka-apekto sa serbisyo sa munisipyo.
Diretsahan man nga ginhayag it alkalde nga ku Enero 11 nga dapat hay regular session, naghinueat segun ro mga SB member bangud owa eonman it quorum, pero kung bonus segun ro paga istoryahan hay nagapatigayun pa special session.
May pila man segun sanda nga request nga owa gin aprubahan it SB nga owa it gintao nga valid nga rasun.
Sa kamatuoran hay pwede segun nga i-exercise it alkalde ro anang veto power sa pilang created position it bise alkalde, pero owa segun imaw naga pamulitika kundi ro anang gusto hay makabulig nga mapadasig ro serbisyo sa SB office.
Sa makarun suno sa alkalde, ro Numancia hay fourth class municipality.
Uman nga umapela si Mayor Templonuevo kay Vice Mayor Enero ag sa mga Sangguniang Bayan members nga aprubahan eon ro budget for the fiscal year 2024 bangud deserve segun it Numanciahanon ro madasig, mayad ag tampad nga serbisyo halin sa andang mga lider it nasambit nga banwa. // ANN DESLENE SALAZAR