LEGAZPI CITY – Pigsiyerto kan Municipal Disaster Risk Reduction and Management Office (MDRRMO) Daraga, Albay na naka-standby an saindang mga personahes nganing magbantay asin mag-asister sa anuman na dai piglalaomang mga insidente ngunyan na Semana Santa.
Sa intrevista kan Brigada News FM Legazpi kay MDRRMO Daraga head Engr. Bhim Dineros, sinabi kaini na nasa blue alert status an Emergency Operations Center ninda ngunyan, boot sabihon, nakaalerto sinda para sa mga untoward o seryosong mga insidente sa banwaan.
Segun saiya, saro sa mayormenteng lugar na pigtututukan ninda iyo an Cagsawa Ruins na taun-taong pigruruso nin tawo sa mga panahon na ini.
Sinabi pa ni Dineros, nasa poko mas omenos 20 mga personahe ninda sa opisina an naka-standby asin ready to be deployed sa anuman na insidente.
Apwera kaini, pag-abot naman sa mayor na aktibidad sa Semana Santa siring kan prusisyon sa Biyernes Santo, pigsiyerto ni Dineros na igwa sinda nin koordinasyon sa PNP, BFP asin PSO.