Dead on the spot ang isa ka menor de edad nga lalaki matapos dumasok ang ginamaneho nga motorsiklo sa likod sang truck sa Barangay Jolongajog, Pontevedra, Capiz takna alas 9:10 kagab-i sang Sabado, Marso 9.
Ginkilala ang napatay kay alyas “Jan-jan,” 15-anyos kag residente sang Sitio Hacienda Olive sa nasambit nga banwa.
Sandig sa imbestigasyon sang Pontevedra Municipal Police Station, samtang ginasubay sang biktima ang dalan gikan sa Brgy. Binuntucan kag pauli kuntani sa ila puluy-an, pag-abot sa lugar nga ginluntaran sang aksidente, bumunggo ini sa truck nga naga-parking sa kilid sang dalan.
Bangud sa impact sang pagkabunggo, nag-angkon sang patal nga pilas sa ulo ang biktima nga gintunaan sang iya gilayon nga kamatayon.
Ginkustodiya naman sa Pontevedra MPS ang motorsiklo kag truck nga naulamid sa aksidente para sa nagakaigo nga disposisyon.
Sa karon, yara na ang bangkay sang biktima sa isa ka punerarya sa nasambit nga banwa. | Judy Ann Juare