LEGAQZPI CITY – Isasagibo ngunyan na aldaw kan Bureau of Fire Protection (BFP) Bicol an Kick-Off Ceremony katakod kan pagseselebrar kan Fire Prevention Month sa bilog na bulan nin Marso kasarabay an manlain-lain na ahensya de gobyerno, eskwelahan, fire brigade, pribadong kompanya asin iba pa.
Segun kay Regional Information Officer FSINSP Edgar Tañajura, Jr., magkakaigwa nin mga programa an ahensya kun saen manlain-lain na mga aktibidad an isasagibo sa kada probinsya sa nasambit na rehiyon.
Apwera pa kaini, magkakaigwa nin firesquare road show na papartisiparan kan mga estudyante, kun saen tutukduan asin ipapaeksperyensya sa sainda an piggigibo kan mga bumbero siring kan pagsagibo nin CPR, basic life support asin iba pa.
Dugang pa kaini, magkakaigwa nin mga aktibidad asin fire brigade sa barangay.
Pigsyerto kan opisina na papakusugon an fire safety awareness campaign sa bilog nin Marso.
Sinabi pa ni Tañajura, mabugtak sinda nin art exhibit sa mga malls tanganing ipahiling an mga ginibong pagbabago kan BFP asin mga aktibidad na sinasagibo sa mga eskwelahan asin barangay.