HIMOONG level up sa mga tanod ang pagbantay sa ilang mga barangay human mipailawom sa skills enhancement training nga gipangunahan sa kapulisan ug DILG – GenSan.
Lalis nga mopadulong sa dakong away ug away silingan, pipila lang kini sa mga eksena sa kadalanan nga sagad ginarespondehan sa mga tanod. Butyag ni Roger John Cahayag, lisod ang obligasyon sa pagmintina sa kahapsay ug kalinaw apan dako og tabang ang pagpailawom niya sa training.
Sa bahin ni Tomas Nipa, bisan paman dugay na siya nga tanod sa Barangay Calumpang importante alang kaniya ang dugang kaalam. Giila usab ni Police Lt.Col. Patrich Elma, sa City Community Affairs Development Unit (CCADU) sa GenSan City Police Office (GSCPO) ang tabang sa mga tanod isip force multipliers. Tumong sa aktibidad ang mapalambo ang kapasidad halos 400 ka tanod gikan sa 26 ka barangay, dili lang sa crime scene prevention apan sa pagresponde sa kalamidad. I Richel Gubalani