Patay ang usa ka batan-ong babaye samtang angol ang duha niya ka mga kauban sa nahitabong pagpang-rakrak sa grupo sa mga batan-on nga nag-standby sa Nene Mart Convenience Store, sa Barangay Yati sa lungsod sa Liloan kaganihang kadlawon, Mayo 9, 2024.
Giila ang nakabsan sa kinabuhi nga si Anaiza Wagas, 16 anyos, residente sa Looc, Poblacion, Liloan, diin naka-angkon kini og duha ka samad pinusilan sa iyang dughan.
Samtang ang laing duha ka mga biktima mao sila si John Lloyd Intan, 18 anyos, residente sa Landing, Catarman, Liloan ug Kyle Supatan, 17 anyos, residente sa Yati, Liloan.
Ang 18 anyos nga biktima, naka-angkon og duha ka samad pinusilan sa iyang dughan ug tiil, samtang ang 17 anyos adunay upat ka samad pinusilan.
Sa inisyal nga pakisusi sa kapulisan, ilang nasayran nga ang mga biktima, nag-standby lang sa maong convenience store kauban ang ilang mga higala dihang kalit nga miabot ang gibana-banang lima ka mga tawo nga nagsakay og duha ka motorsiklo og mipa-uwan og bala ngadto kanila.
Atol sa follow-up operation sa otoridad sa dapit, naka-recover sila og 18 ka mga empty shells ug duha ka slugs sa wala pa matino nga kalibre sa armas.
Matud ni Liloan Police Station chief PMAJ Eric Gingoyon nga aduna na silay persons of interest sa maong insidente.//