NAKAHUKOM ang mga driver sa Public Transport Alliance of GenSan kun PTAG nga mopadayon sa programang Libreng Sakay sa Land Transportation Franchising and Regulatory Board kun LTFRB hangtud katapusan sa Hunyo ning kasamtangan nga tuig.
Sa impormasyon gikan sa PTAG Chairperson nga si Robert Cang nagtagbo sila sa mga driver ug ilang nahukman nga kutob June 30 ang ilang byahe ilawom sa service contracting kon dili pa makahatag og subsidiya ang gobyerno sa ilang pagpamasada.
Dugang ni Cang nga sa ilang bahin sa 200 ka unit matag adlaw anaa sa P700,000 hangtud P800,000 pesos ang bayrunon sa gobyerno ngadto kanila sa 16 oras nga serbisyo sa mga health workers ug Authorized Persons Outsite Residence kun APOR ug sa karon ang ginapaabot nga bayad sa Ladotransco lamang anaa na sa kapin P4 ka milyon ka pesos.
Ang gamay og capital nga mga kooperatiba maoy unang nangundang samtang sila nagpadayon human nga may nagpautang kanila, apan kon dili sila mabayaran hangtud katapusan nalang sa bulan sa Hunyo ug undangon na nila ang Libreng Sakay nga serbisyo.
Kahibaluan nga ilawom sa programang Libreng Sakay anaa sa P52 pesos ug 50 sentimos matag kilometro ang bayaran sa gobyerno ngadto sa account sa mga kooperatiba. Sa bahin sa LTFRB nagpasalig ang Regional Director nga si Renato Padua nga ginapadalian na nila ang proseso aron mabayaran ang mga transport coop. ( Ever Diazon)