Nakabaton sang tig-P2,000 nga financial assistance gikan sa Pinuno Partylist ang 1,194 ka mga fisherfolks nga apektado sang red tide sa Roxas City.
Sa interview sang Brigada News FM Roxas City kay Solima Sabanal, isa ka manugtalaba kag residente sang Brgy. Mongpong sining syudad, iya ginpahayag nga dako gid ang mabulig sa iya sang amo nga ayuda bangud makabakal na sila sang ila pang-adlaw adlaw nga kinahanglanon.
Suno naman kay Delaila de Andres, residente sang Brgy. Olotayan, iya ginpahayag nga nakibot nalang ini sang ginsilingan siya nga isa ini sa makabaton sang ayuda gani tuman gid ang iya pagpasalamat sa naglista sang iya pangalan.
Dugang pa sini, ang iya kwarta nga nabaton ang ibakal niya sang bugas kag sud-an agud may ipauli siya sa iya pamilya.
Nahibaluan nga magluwas sa mga fisherfolks, nakabaton man sang financial assistance ang mga Barangay Tanod sa 47 ka kabarangayan sa syudad. | Judy Ann Juare