Ginpangwasak kag ginpang-disposed na sang kapulisan ang ila mga nakumpiskar nga palupok sa probinsya sang Capiz.
Ini ang ginhiwat sa Capiz Police Provincial Office (CPPO) kag ginpangunahan ni Police Colonel Jerome Afuyog, Jr., sadtong tinalikdan nga Domingo, Enero 7.
Naglab-ot sa 2,271 ka unlabeled nga firecrackers ang ginpangbasa sang tubig kag 267 ka mga boga ang ginpangwasak pinaagi sa paglapak sang police patrol.
Ginpahayag ni Afuyog, apisar ginpasangkad nila ang kampanya kontra sa palupok, madamo sa gihapon ang nagabaligya kag nagahimo sang mga dalagkuan nga boga.
Nahibaluan nga naglab-ot sa 21 ang mga nabiktima sang palupok sa probinsya kag isa diri ang ginbawian sang kabuhi.
Nagalaom si Afuyog nga indi na madugangan pa ang mga mabiktima sang palupok.
Nagapanawagan man ini sa mga ginikanan ukon guardians nga bantayan gid ang ila mga kabataan nga nagahimo sang boga agud malikawan nga mabiktima. | Judy Ann Juare