LEGAZPI CITY – Tinawan-doon kan Department of Health (DOH) Bicol an mga posibleng epekto kan El Niño phenomenon na pwedesir makaapektar sa salud.
Sa intrevista kan Brigada News FM Legazpi kay DOH Bicol Medical Officer III Mildred Tianes, sinabi niya na kaibahan digdi an diarrheal diseases huli sa kondisyong dara kan tag-init na nagkukulang asin nagkakaigwang kontaminasyon sa tubig.
Sinabi pa ni Tianes na sa phenomenon na ini, posible man giraray magkaigwa nin mga makukusog na pag-uran na pwedesir magkawsa ki mga pagbaha asin umambag sa tiyansa nin paglangkaw sa kaso nin dengue, chikungunya, asin leptospirosis.
Apwera kaini, an mga senior citizens man madalas tamaan kan mga kamateang ini durante sa kaluyahan kan saindang immune system asin madali sinda makamate nin dehydration.
Segun pa saiya, igwa nang mga reported case kan mga nasambit na helang sa rehiyon alagad padagos pa nindang pigve-verify sa presente.
Sa ibong kaini, an ahensya padagos na ipinapabot sa publiko na ugalion an paghugas nin kamot, siyertuhon na malinig an pigkukuhaan nin tubig, asin kun dae sigurado sa kalinigan nin tubig, mas maray kun papakalakagaon ini.
Mientrastanto, sinabi pa niya na bukas an Legazpi City Health Office asin Rural Health Units sa publiko nganing makatao nin serbisyo na makakatabang para sa saindang mga kamatean. | Brigada Intern RICHELLE ASTOR