GIPLASTAR na karon ni Kapitan Renante Curit sa Barangay Fatima ang mga volunteers sa kada purok aron malikayan nga mahitabo ang sitwasyon nga usa ka tanod ang gipusil patay human gisita ang gidudahang kawatan.
Segun ni Curit dakong kawad-on kanila si Ryan Laureano nga gibuhis ang kinabuhi aron lang proteksyunan ang mga katawhan sa barangay.
Tungod sa insidente, nakig-alayun sila sa hepe sa Fatima police station aron sa pag-organized sa mga volunteers ug mahatagan og igong kahimanan sama sa handheld radio ug suporta sa kapulisan.
Sa insidente sa pagpangawat sa mga vendo machine ug uban pang butang, gibutyag ni Curit nga may ginapanid-an na ang mga intel unit nga gitawag niining semi organized group nga gahimo sa maong krimen. “Semi organized group, kay may mga motor na sila, may bolt cutter ug may mga armas pa, medyo dili na yano nga hilabtunon.”
Alayun niini, padayun usab ang pagpatuman sa curfew hour sugod alas 10 sa gabi isa minors ug sa tanan, hangtud alas 4 sa kaadlawon aron nga masuta ang lihok sa mga residente apan giklaro ni Curit nga granular lang ang pagpatuman sa maong curfew.
Subli usab nga gipahinumdum ni Kapitan Curit nga ang peace and order ang concerned sa tanan ug gihangyo nga motabang usab sa otoridad.
Giawhag usab ang mga residente nga magbutang poste nga may suga gawas sa ilang balay aron mahayagan ang kadalanan ug mapugngan ang mga pagpangawat panahon sa gabii.