Excited na ang mga maestro kag maestra sa syudad sang Roxas sa luyag ipatuman ni Vice President kag Department of Education Secretary Sara Duterte nga 30-days school break para sa pagtakop sang school year 2023-2024.
Sa interview sang Brigada News FM Roxas City kay Mr. Jose Richard Lachica, Principal II sa Banica Elementary School, iya ginpahayag nga maayo gid ini nga balita bangud mahatagan na sang malawig nga pahuway ang mga manunudlo.
Apang nagakabalaka ini kun ipatuman gid man ang 30 days’ school break base indi malab-ot ang target nga competencies nga dapat ma-master sang mga estudyante sa pagtakop sang school year.
Nahibaluan nga ginpahayag ni Duterte sa kick-off ceremony sang National Teacher’s Month sa Tagbiliran, Bohol nga magapaguwa siya sang memorandum angut diri.
Sa iya nga speech ginsiling ni Duterte nga sa ini nga school calendar, iya ipasiguro ang isa ka bulan nga pahuway sang mga manunudlo nga wala sang ginahikot nga Dep-Ed activity nga nagakinahangalan sang volunteer works.
Ginkilala man sang bise presidente ang importansya sang mga manunudlo rason nga luyag niya pataasan pa gid ang benepisyo nga ginabaton sang mga ini.
Nag-request man si Duterte sa Department of Budget and Management (DBM) kag Civil Service Commission sang higher allocation para sa teaching overload pay.
Dugang pa ni Duterte nga indi mabayaran sang kwarta sang nangin kontribusyon sang mga manunudlo sa pungsod kag sa buwas damlag sang mga kabataan. | Judy Ann Juare