LEGAZPI CITY – Kinumpirmar kan Legazpi City Health Office (CHO) na dakol paman giraray sindang nagkakadarakop na nagbabalgar sa inimplementar nindang smoke-free ordinance sa syudad.
Ini an sinabi ni CHO Enforcement team Leader Jose Balbin sa Brigada News FM Legazpi.
Segun kay Balbin, dakol an nagkakadarakop ninda bako sana mga indibidwal kundi magin sa laog mismo nin mga establisimento.
Sinabi niya, puon kan Agosto 1 hasta Setyembre 12 ngunyan na taon, nasa 231 nang mga establisimento ang saindang nabibisita na kumpwesto nin mga barangay halls, opisina de gobyerno, mga eskwelahan, kaunan, asin iba pa.
Sa regular nindang pagkondusir ki mga visitations, pirmi sindang nakakaengkwentro ki mga nagbabalgar.
Sa datos ninda, 561 na an mga nairehistrong nagbalgar sa ordinansa puon kan Enero hasta Agosto.
Segun pa kay Balbin, kadalasan sa saindang nagkakadarakop, apwera sa mga nagagaramit nin sigarilyo, igwa ki mga nagpapabarakal kaini na 100 meters an distansya sa mga establisimento siring kan mga eskwelahan.